Lulzim Basha mblodhi Këshillin Kombëtar të një prej dy PD-ve, mes të cilave endet dhe një e tretë mes të dyjave, atë zyrtare, duke arritur të mbushë Pallatin e Sportit “Asllan Rusi” me përkrahës të tij.
Prej aty, ai bëri thirrje për bashkim.
“Unë sot i bëj një thirrje miqve tanë të Foltores, anëtarëve të thjeshtë deri te strukturat e asaj lëvizje. Të gjithë kanë një vend në Partinë e madhe Demokratike, të gjithë mund të bashkohen pa asnjë kufizim, në çdo çast, në çdo moment janë të mirëpritur për të ndërtuar një aleancë të madhe, jo thjesht mes demokratëve, por edhe me shoqërinë shqiptare. Partia Demokratike ka qënë dhe do të mbetet partia e parë e së djathtës, nga historia, nga potenciali dhe nga shpresa që rrezaton. Ne do të ndërtojmë një federatë të gjerë, jo thjesht me parti të tjera të djathta dhe aleate të cilat janë të mirëpritura në projektin tonë të përbashkët. Ne do ta zgjerojmë këtë
aleancë përtej këtyre partive”, u shpreh Basha.
Sa për Berishën, ai tha shkurt e qartë: “Ne nuk duhet të harxhojmë më asnjë sekondë me të shkuarën”.
Njëherësh, Basha nuk pranoi që ai është pjesë e politikës së vjetër.
“Asnjëherë nuk jam pjesë e politikës së vjetër, nuk i kam lënë hapësirë krimit të organizuar. Sot ne fillojmë bashkë një rrugë të re. Asgjë nuk është më si më parë…”, tha ai.
Duhet kujtuar se ndërsa Berisha ka të paktën tre a katër bashki, sa për të thënë se ka sadopak pushtet,
fituar në zgjedhjet e fundit lokale, PD-ja zyrtare që u drejtua nga Alibeaj deri dje, nuk ka asnjë dhe pati një rezultat tejet dëshpërues në zgjedhje.
Pra Basha, edhe pse trashëgon PD-në zyrtare, nuk trashëgon ende elektoratin e plotë të saj, i cili, sipas rezultatit të fundit elektoral, anon nga Berisha. /tesheshi.com/
