Partia Demokratike nuk ka ndërmend të bëjë një reformë zgjedhore fasadë, por një proçes që do të realizohet përmes konsultimeve të gjera. Kështu u shpreh kreu demokrat Lulzim Basha, ndërsa në Kuvend është depozituar kërkesa për ngritjen e një komisioni ad-hoc për këtë reformë.
Basha vuri theksin në 3 kushte të panegociueshme për reformën zgjedhore, duke shprehur gadishmërinë për të diskutuar cilindo model zgjedhor që garanton implementimin e tyre.
“Votimi elektronik, uljen e rolit të kryetarëve dhe partive politike në proçes, dhe rritjen e rolit të qytetarëve në zgjedhje”, tha Basha, duke bërë të njohur edhe kushtet e PD-së.
Në lidhje me votën e emigrantëve, kreu demokrat tha se ky ka qenë një premtim i kahershëm i demokratëve, ndërsa shtoi se pavarësisht se flamurin po e marrin socialistët, nuk do të lejojmë që kjo të kthehet në fasadë.
“Vota e emigrantëve është kërkesë fillestare e PD-së dhe nuk do të lejojmë që të kthehet në fasadë nga Edi Rama, që nuk lejoi të votojnë shqiptarët këtu e jo më ata që jetojnë jashtë vendit”, tha Basha.
Në vijim ai paralajmëroi depozitimin në Kuvend të një drafti ligjor që do të ndalojë shfaqjen e simboleve të komunizmit dhe diktaturës, ndërsa përmendi si shembull Gjermaninë, ku nuk lejohen simbolet e nazizmit. /tesheshi.com/
