I entuziazmuar politikisht nga protesta e studentëve, si dhe nga një e dhënë për falsifikim të mundshëm firme në dokumentacionin e një firme ndërtimi në projektin e Unazës së Re, kreu demokrat Basha ishte sërish te protestuesit e “Astirit”.
Ai dhe njëherë bëri thirrje për rezistencë, me bindjen se qeveria është në një përballje të vështirë me zemërim popullor.
“Këta banorë qëndruan ditë e natë këtu, dhe u përballën. Rama e Veliaj i quajtën shpellarë, të pasur me nga 4-5 shtëpi, arrestuan djem e vajza dhe i çuan në qeli, i mbytën me propagandë kundër të gjithëve që i kundërshtonin. E kanë humbur davanë, tani kanë frikën e karriges”, tha Basha.
Por ndërkohë, nga studentët i është bërë thirrje që të mos afrohet të shtunën në protestën e tyre, pasi koinçidon me 8 Dhjetorin, “Ditën e Rinisë” që PD e ka si kremtim partiak për Lëvizjen e Dhjetorit. /tesheshi.com/
