Kreu i Partisë Demokratike, Lulzim Basha është takuar sot me udhëheqësen e misionit vëzhgues të OSBE-OHDIR në Tiranë, Audrey Glover. Në përfundim të takimit, të cilin e ka cilësuar si produktiv, është shprehur se kishte pika të përbashkëta shqetësuese me shefen e misionit të vëzhguesve, në lidhje me shkatërrimin e standardeve të zgjedhjeve të 21 qershorit.
“Kisha një takim produktiv me kryetaren e komisionit të vëzhguesve. Shqetësimet e prekura në raportin paraprak për shkatërrimin e standardeve zgjedhore janë dokumentuar nga vëzhguesit në terren. PD është në procesin e ndërtimit të një raporti të detajuar për shkatërrimin e standardit të zgjedhjeve që kulmuan ditën e zgjedhjeve”,- tha Basha.
Ai shtoi “Shqetësimet tona dhe të OSBE-OHDIR kanë pika të përbashkëta siç është shitblerja e votës, kandidimi i personave me precedentë penalë, falsifikimi i kartave të identitetit, presioni i ushtruar mbi administratën publike, politizimi i institucioneve zgjedhore, dy standarde për zgjedhjet”.
Sipas Bashës, këto shqetësime dhe të tjera janë bërë publike ndërsa shkatërrimi i zgjedhjeve të 21 qershorit është tashmë i dokumentuar.
“Ne do të bashkëpunojmë me OSBE-OHDIR dhe gjithë institucionet e tjera për të ndalur këtë gremisje të demokracisë shqiptare. Kjo është një betejë që PD dhe unë kemi misionin tu qëndrojmë në ballë qytetarëve shqiptarë, të cilët do të kenë besim të plotë se e drejta e tyre themelore për të dhënë votën të lirë për kandidatë të denjë për votën e tyre, do të mbrohet deri në fund dhe denjësisht nga PD. Do të nisim një betejë pa kthim për vendosjen e standardeve. Kjo do të thotë një zgjim i madh qytetar në mbrojtjen e standardeve zgjedhore”,- përfundoi Basha./tesheshi.com/
