Lideri i opozitës, Lulzim Basha pas qëndrimeve disa herë të përsëritura se BE nuk do t’i hapë negociatat për Shqipërinë, sot ka dalë në një konferencë për shtyp me disa deputetë austriakë, ku ka kërkuar nga Vjena që të mos mashtrohet nga ajo e quajti nga “gogoli i Ramës” për ardhjen e refugjatëve.
“Një dimension i tillë që kapërcen kufijtë e vendit tonë nuk mund të jetë një vendim i vetëm një personi, aq më pak nëse kjo serviret si karamele për të ëmbëlsuar gojën e hidhur të Europës nga skandalet Tahiri, Xhafaj dhe lufta e pamjaftueshme kundër drogës dhe krimit”, tha Basha pas një takimi me deputetët e ardhur nga Vjena.
Ndërkohë, njëri prej deputetëve austriakë u shpreh se Austria është “pro hapjes së negociatave me Shqipërinë”, por shtoi se “lufta ndaj krimit të organizuar është thelbësore”.
“Rasti i ministrit Xhafaj duhet të trajtohet në një mënyrë të besueshme”, deklaroi ai.
“Shqetësimet për gjendjen politike në vend mbeten, por i kam kërkuar miqve tanë që negociatat të hapen”, theksoi Basha nga ana e tij. /tesheshi.com/
