Kreu i opozitës, Lulzim Basha ka qenë në qytetin e Sarandës ditën e sotme, nga ku veçse ka sulmuar Kryeministrin Edi Rama duke thënë se rri i mbyllur në zyrë me skicat e veta dhe jo me hallet e popullit, ka deklaruar se Partia Demokratike do të jetë ajo që do të bëjë ndryshimin.
“Ky është i vetmi Kryeministër në botë që e kalon kohën e tij në një zyrë i rrethuar nga skicat e veta dhe jo nga hallet e shqiptarëve që sa vijnë e shtohen. Dhe kur i duhet të dalë nga zyra e merr zyrën me vete. Duhet që ne ti bindim shqiptarët që ky ndryshim është një ndryshim tek i cili gjithkush mund të besojë se gjithkush do të përfitojë. Detyra numër një e njerëzve të angazhuar në politikë është të jetojnë me të vërtetën e qytetarëve, është të jetojnë me të vërtetën e njerëzve, ky është misioni ynë”, – tha Basha.
Kryedemokrati është takuar me demokratët e Sarandës, fermerët e Xarës dhe operatorët turistikë të qytetit ku ka premtuar se politika do të ndryshojë, duke ndryshuar së pari Partinë Demokratike.
Sipas tij, bashkimi, hapja, komunikimi i përditshëm me qytetarët, njohja e halleve dhe problemeve të tyre janë tre procese që garantojnë që; refuzimi, zemërimi, depresioni të kthehen në shpresë, në besim dhe orientim për shqiptarët tek kjo forcë politike, forca e ndryshimeve të mëdha historike, është mënyra e duhur për të sjellë ndryshimin.
Ai shprehu sigurinë se Partia Demokratike edhe një herë është gati të marrë përsipër misionin e ndryshimit që po vjen./tesheshi.com/
