Kreu i PD-së, Lulzim Basha ka pasuar paraardhësin e tij, ish-liderin Berisha në një qëndrim të hidhur të mbajtur ndaj ambasadorit Lu. “Nuk pres unë që ambasadori të më tregojë se cila është detyra ime”, tha Basha gjatë një prononcimi pas mbledhjen së grupit parlamentar demokrat, duke komentuar çuarjen e vetting-ut në Kushtetuese, një akt që tregoi shpërfillje totale ndaj apelit të ndërkombëtarëve për të mos e ndërmarrë këtë akt.
“Nuk biem dakord me paçavuret e mafias dhe korrupsionit. Ligji për “Vetting”-un është antikushtetues dhe ne presim që të çmontohen ato nene antikushtetuese dhe kemi bindjen se kjo do të ndodhë”, tha Basha, gjuha e cilit ishte jo vetëm e ashpër por dhe aluduese për të gjithë ato segmente të diplomacisë së huaj që mbështesin vetting-un.
E ndërkaq, Basha ka rikonfirmuar votimin e SPAK-ut, Prokurorisë Speciale në kuadër të reformës në drejtësi, duke e parë atë si triumf të PD-së,
“Falë qëndresës sonë, ligji nesër është në përputhje me standardin që PD-ja ka kërkuar që prej ditës së parë. Saimir Tahiri dhe klanet e drogës, që sot kanë marrë goditje nga sekuestrimi i 20 tonëve drogë, Edi Rama, Ilir Beqja dhe Arben Ahmetaj nesër nuk do e kenë ditë të mirë. Struktura që votohet nesër do të jetë makthi i çdo qeveritari të lidhur me krimin. Ligji për SPAK-un do të mbrojë qytetarët shqiptarë. PD-ja do të ketë aleat të fuqishëm kundër korrupsionit me këtë strukturë”, tha Basha. /tesheshi.com/
