Një deklaratë e Lulzim Bashës bërë së fundi ka goditur fort mbi atë që e solli në politikë dhe që e ngjiti deri në majën e PD-së, Sali Berisha; njëherësh dhe ndaj gjithë atyre zërave kundër tij brenda kampit blu, të cilët e akuzojnë se e ka çuar partinë keq e më keq.
Deklarata u bë në fund të një takimi mbi ekonominë organizuar nga “Forumi Pashko” në UET-in e Henri Çilit, ku Basha pasi denoncoi sipas tij ekonominë në zgrip të Ramës, e shpalosi gjithashtu vizionin e tij qeverisës mbi një ekonomi krejt tjetër dhe padyshim në ngritje, siç tha, sipas një programi të hartuar nga ekspertë gjermanë e amerikanë, kaloi më pas në planin politik, duke theksuar se kjo ekonomi nuk mund ta vijë pa një ndryshim brenda politikës. Dhe këtu më pas Basha bëri një deklarim që mund të quhet kurajoz.
“Dhe në një mbyllje që ndoshta nuk lidhet me forumin për liritë ekonomike por me forumin për liritë politike, kjo është pikërisht ajo që do bëjë Partia Demokratike: do ta nisë duke dhënë shembullin e vet, duke modernizuar plotësisht funksionimin e saj, duke zhdukur çdo pengesë autokratike, të vërtetë apo të perceptuar, duke i dhënë mundësinë çdo demokrati apo çdokujt tjetër që beson në parimet e lirisë, demokracisë dhe standartet europiane, që të ketë mundësi të konkurojë dhe të përfaqsojë axhendën tonë europiane…”
Berisha gjendet tek “pengesat autokratike” në fjalën e Bashës, pak me poshtë gjenden kritikët e tij.
Por më e rëndësishme është e para. Basha është parë gjithnjë si një fëmijë i bindur i Berishës në PD, i pafuqishëm të jetë vetvetja dhe ta heqë qafë të kaluarën e kësaj partie. Por ndërsa ka bërë një deklarim kurajoz, do pritet të shihet në kohët në vazhdim nëse vërtet fjalët do kenë rezultat në terren. /tesheshi.com/
