Kreu demokrat Basha kaloi nga shëndetësia në arsim në kumtimin e radhës së programit të PD-së, duke premtuar dhe në këtë sektor rritje pagash.
“Ne do të rrisim me 60% pagat e mësuesve dhe as edhe një mësues nuk do të marrë më pak se 700 euro në muaj rrogë.
Kështu ne do sjellim më shumë të ardhura dhe mirëqenie për 35 000 familjet e mësuesve tanë të arsimit parauniversitar.
Do të rrisim pagat me 50%, duke ju garantuar pedagogëve paga prej 900 eurosh në muaj dhe profesorëve paga prej 1300 euro”, tha Basha.
Basha premtoi gjithashtu dhe tekste falas për arsimin parauniversitar.
“Angazhohem se do të sigurojmë tekste shkollore të reja falas, për 350 000 nxënës.
Po kështu fëmijët e të gjitha familjeve në nevojë do të përfitojnë paketa shkollore dhe tekste falas gjatë gjithë arsimit parauniversitar. Ne nuk do të lëmë asnjë fëmijë pa ndihmuar”, tha Basha. /tesheshi.com/
