Duke përkujtuar 2 Prillin ’91, ditën e vrasjes së katër shkodranëve gjatë një proteste politike anti-pushtet, kreu demokrat Basha lidhi të djeshmen me aktualitetin në mesazhet që përçoi.
“Në këtë 28-vjetor nuk tingëllon kurrë më aktuale sakrifica e 2 Prillit sesa sot. Asnjëherë nuk ka qenë më e kërcënuar demokracia, liria për të zgjedhur me votë dhe rrëzuar me votë qeverinë sesa sot.
Në delir nga aleanca e politikës me krimin, e krimit politik që vijon të përgjakë Shkodrën dhe gjithë Shqipërinë, shëmbëlltyra e këtij regjimi mendon se mund ta likuidojë opozitën, se mund të bëjë edhe pa të dhe se mund ta marrë Shkodrën edhe pa zgjedhje, e mund ta mbajë Shqipërinë pa zgjedhje e në zgjedhë për sa kohë t’i nevojitet, mundësisht përjetësisht. Kjo nuk ka për të ndodhur”, tha Basha
Sipas tij, ka shumë arsye sot për ta përkujtuar 2 Prillin.
“Për Shqipërinë është kujtesë e përhershme se rrënjët e së keqes nuk thahen nëse nuk i shkulim njëherë e mirë, rrënjët e së keqes ushqehen me vesin, me krimin e pandëshkuar”,theksoi kreu demokrat. /tesheshi.com/
