Lulzim Basha në Dibër përdor argumentin e Edi Ramës, Rrugën e Arbrit dhe tha se atë do ta ndërtojë ai kur të bëhet Kryeministër.
Rama tha se nuk do të largohet nga zyra pa bërë rrygën e Arbrit në prezantimin e kandidatit të maxhorancës për Dibrën, Muharem Rama.
Por po nga një prezantim, këtë herë nga ai i kandidatit të opozitës, Sherefedin Shehu, kryetari i Partisë Demokratike, Lulzim Basha tha se këtë rrugë do ta përfundojnë ata që e nisën.
“Punët i bitis ai që i nis! Ne që e nisëm, ne do ta përfundojmë Rrugën e Arbrit”, tha Basha duke akuzuar Qeverinë se nuk ka shtruar asnjë metër rrugë.
Duke u ndalur tek kandidati Shehu, Basha tha se dibranët do të kenë kryetar bashkie një njeri të ndershëm që politika ndër vite nuk e ka prishur dhe korruptuar, por e ka ngritur në një figurë më të aftë dhe më të përgjegjshme.
Ndërkohë, kandidati Sherefedin Shehun, në fjalën e tij përpara qytetarëve tha se qëllimi i tij është të “ndërtojë Dibrën”.
“Kërkoj besimin tuaj për të ndërtuar Dibrën. Dua të shërbej bashkë me ju për ta ndërtuar këtë qytet. Keni provuar mashtrimin dhe grabitjen e pushtetarëve. Kjo qeveri ka rritur varfërinë dhe rinia ka humbur shpresën për të jetuar në këtë vend. Por, kryeministri vazhdon të tallet me dibranët, duke i kërkuar votën që t’i shtojë të këqijat”, tha Shehu.
Më tej, Shehu theksoi se në Bashkinë e Dibrës nuk do të ketë familje në errësirë për arsye se nuk paguajnë dot energjinë.
“Në dispozicion të këtyre familjeve do të ketë një fond të posaçëm për pagesën e energjisë, në mënyrë që fëmijët të mësojnë me dritë”, tha Shehu.
Kandidatin demokrat e kanë mbështetur gjatë tubimit edhe kryetari i Partisë Republikane, Fatmir Mediu, ndërsa është rikthyer pas disa vitesh mungese në jetën aktive politike edhe Besnik Mustafaji, i cili u kërkoi dibranëve që më 11 shtator të mbështesin me votën e tyre kandidatin demokrat, Sherefedin Shehun.
/tesheshi.com/
