Ish-kreu i PD-së Basha, në përpjekjen e saponisur për të marrë sërish drejtimin e partisë, tha për të “n”-ën herë se Shqipërisë i duhet një politike e re, një drejtim i ri, duke nënkuptuar veten me këtë.
“Një Shqipëri e çliruar nga korrupsioni është prioriteti i çdo qytetari të këtij vendi.
Sot Shqipëria ka nevojë për pastrimin e politikës, ndarjen me krimin dhe largimin nga sistemi të politikanëve të korruptuar. Kjo është plotësisht e mundur përmes vetting-ut në politikë. Nuk është e lehtë, por është dëshmia e parë e cila ndan ata që e kanë frikë, me ata që s’kanë asgjë për të fshehur.
Partia Demokratike është gati të ndërtojë një aleancë gjithëpërfshirëse me të gjithë faktorët shoqërorë, për një projekt ndryshimi që nis me zgjidhjen e çështjeve që mbajnë të bllokuar sistemin politik dhe atë ekonomik:
Listat e hapura;
Vetting-un në politikë;
Kufizimin e mandateve;
Votën e diasporës;
Zgjedhjen e Presidentit nga populli”, shkruan së fundi Basha.
Çështja është se të njëjtin vizion shpaloste dhe Rama para se të vinte në pushtet, kuptohet me fjalë të tjera, shumë më bindëse në mënyrën e të shprehurit.
Dhe ky është qerthulli politik i Shqipërisë në më shumë se tre dekada: ai që është në opozitë premton të jetë ndryshe, por sapo vjen në pushtet është vërtet ndryshe, pa ngjarë aspak me atë që ishte në opozitëm por duke ngjarë me atë që ishte në pushtet. /tesheshi.com/
