Në një takim me studentë e pedagogë, kreu demokrat tha se programi i PD-së e sheh shumë të avancuar sferën universitare, e cila sipas tij duhet të efektojë në punësim.
“Universitetet nuk u përgjigjen nevojave të tregut. Bashkëpunimi universitet-biznes ka nevojë për incentivat. Programi ynë ‘Shqipëria fiton arsimin’ është një plan pune për qeverinë e nesërme.
Të vetëdijshëm për nevojat e realitetit ekonomik, ne mund të krijojmë mundësi të jashtëzakonshme për rininë.
Falë teknologjisë të rinjtë tanë mund të bëjnë punë të mirëpaguara që nga Shqipëria”, tha Basha.
Sipas tij, studentët dhe rinia duhen mbajtur këtu, e për këtë duhet të ketë politika favorizuese.
“Nuk duhet të lëmë asnjë të ri pa mundësinë për të studiuar. Do të financojmë 100% të tarifave për 90% të studentëve. Do të financojmë infrastrukturën universitare për programe që punësojnë.
T’i japim rinisë mekanizmat që këtë sukses ta gjejë edhe në Shqipëri.
Ne do të marrim atë që nuk e kemi marrë: investime të huaja direkte dhe punë me rroga të larta. Kështu i shërbejmë ndaljes së emigracionit të rinisë”, arsyetoi i pari i opozitës. /tesheshi.com/
