Kryetari i Partisë Demokratike, Lulzim Basha thotë se shteti është kthyer në një bandë, e cila “lufton” mes vetes për pazaret e drogës. Gjatë një takimi me elektoratin e PD-së në Mirditë, Basha ju referua përplasjes së policisë së Lezhës dhe Rrëshenit për 4.2 tonët e drogës, të kapura në ish –pularinë e qytetit.
“U rrethua ish-pularia sepse ishte sinjalizuar prani e madhe e drogës. Çfarë ndodhi?! Policia e Rrëshenit u tërhoq, iku fare nga skena, Policia e Lezhës nuk pranonte të ndërhynte. A nuk janë këta policët që i marrin shpirtin qytetarit se nuk ke vënë rripin e sigurisë?! A nuk janë këta që Saimir Tahiri i çon për të marrë fermerin, fshatarin, qytetarin që vë pesë tjegulla në çatinë e vet dhe i rras brenda, i terrorizon, apo për një faturë tatimore, apo për çështje të energjisë dhe kur shkojnë te pularia për të kap drogën sillen si pulat vetë”, tha kreu i opozitës, duke akuzuar kryeministrin Rama se në mbi 3 vjet qeverisje është shqetësuar vetëm për të vënë pasurinë e tij.
“Sot në Shqipëri kemi një qeverisje e cila shqetësohet vetëm për pasurinë e vet dhe vetëm për pushtetin e vet. Sot në Shqipëri kemi një regjim i cili shqetësohet vetëm për paratë dhe pushtetin e vet. Për paratë dhe pushtetin e vet, kjo qeveri shkel ligjin, mbron kriminelët, godet të pambrojturit. Për paratë dhe pushtetin e vet Edi Rama e ka shndërruar buxhetin e shtetit në pasurinë e tij private me të cilën pasurohet ai dhe një grusht njerëzish”, përfundon Basha./tesheshi.com
