Kreu demokrat Basha pretendon se Shqipërisë nuk iu akordua asnjë fond në Samitin e Poznanit, zhvilluar së fundi në kuadër të Procesit të Berlinit, për integrimin e Ballkanit Perëndimor.
Duke ofruar dhe një hartë se ku do shkojnë 180 milion eurot e BE-së, Basha thotë se Shqipëria po ndëshkohet për shkak të qeverisë së Ramës.
“Shqipëria është i vetmi vend i Ballkanit Perëndimor që nuk përfitoi asnjë qindarkë nga 180 milionë eurot që Bashkimi Europian u dha vendeve të Ballkanit për projekte kombëtare infrastrukturore, për vitin 2019.
Është ndëshkim i qëllimshëm kundër një qeverie të korruptuar dhe të lidhur me krimin. Është vazhdim i qëndrimit të prerë të vendeve të Bashkimit Europian për të mbajtur Shqipërinë jashtë çdo procesi afrimi për aq kohë sa në pushtet është Edi Rama. Qeveria Rama është e vetmja qeveri në 30 vjet tranzicion që nuk ka bërë asnjë hap të vetëm në procesin e integrimit europian.
Fatkeqësisht izolimi ndërkombëtar që po i bëhet qeverisë Rama po sjell pasoja direkte për Shqipërinë dhe shqiptarët, të cilët po ndëshkohen për shkak të Edi Ramës dhe lidhjeve të tij me krimin. Prandaj largimi i Ramës është një arritje që do të përmirësojë jetën e çdo shqiptari”, shkruan Basha.
Kryeministri Rama që qe në Samitin e Poznanit, nuk ka dhënë deri më tani asnjë deklaratë publike lidhur me ç’u arrit aty në interes të Shqipërisë, duke ofruar vetëm pamje të aspekteve të ndryshme të punimeve, e një foto të takimit me Merkel. /tesheshi.com/
