Miniqeveria teknike demokrate në megaqeverinë socialiste, si garante e votës, nuk ka mundur ta mbrojë atë. Kjo së paku kuptohet nga qëndrimi i kreut të PD-së, Lulzim Basha lidhur me standartin e zgjedhjeve, shpalosur në një takim me kreun e misionit të OSBE/ODIHR, Peter Teljer.
“Basha theksoi se problemi i blerjes masive të votave u shtri në të gjithë vendin me përmasa masive dhe organizim sistematik në zona urbane dhe rurale, shoqëruar nga mbledhja e kartave të identitetit. Përvec angazhimit në shitblerje votash të strukturave partiake të PS dhe partive të tjera qeveritare u aktivizuan po ashtu bandat kriminale që vepronin pa asnjë pengesë dhe në disa raste me ndihmën e strukturave shtetërore, si dhe vetë strukturat shtetërore”, thuhet në njoftimin për shtyp shpërndarë nga PD në lidhje me takimin në fjalë.
“Këto nuk ishin zgjedhje demokratike, por prova e fundit e vdekjes klinike të zgjedhjeve të lira në Shqipëri”, mësohet të ketë thënë kreu demokrat. Me këtë qëndrim bie pretendimi i kryeministrit Rama, se këto zgjedhje, për herë të parë do jenë të pakontestuar, falë “armëve” që iu dhanë opozitës për t’i monitoruar ato. /tesheshi.com/
