Përkundër zërave ndërkombëtarë të deritanishëm, kreu i PD-së Basha këmbëgul që se nuk ka as vendim dhe as datë për hapjen e negociatave të Shqipërisë me Bashkimin Europian.
“Shqipërisë nuk i janë hapur negociatat me BE, nuk ka as vendim për hapjen e negociatave, as datë për hapjen e negociatave. Këshilli Europian që është vendimarrësi,nuk do ta shqyrtojë fare nesër çështjen e hapjes së negociatave dhe Këshilli i Punëve të Përgjithshme i mbledhur dje dhe pardje e ka shtyrë këtë vendimarrje të paktën për një vit, deri në qershor të 2019.
Për të mbërritur deri tek vendimarrja deri në qershor të 2019 do të ndiqet e njëjta procedurë si deri më tani. Pra do të ketë një tjetër raportim nga KE për përmbushjen apo jo të kushteve që i janë vënë Shqipërisë, do të ketë një tjetër diskutim nga fillimi nga parlamentet e atyre vendeve që kërkojnë procedurën e autorizimit apo këshillimit të qeverisë si rasti i Bundestagut gjerman apo parlamentit holandez dhe vetëm nëse vendet anëtare konsiderojnë se Shqipëria i ka përmbushur kushtet atëherë mund të futet në axhendën e vendimarrjes në Këshillin Europian në qershor të 2019.
Kjo është e vërteta. E vërteta është se negociatat nuk janë hapur por është thënë se Shqipëria ka mundësi t’i hapen në qershor 2019 nëse plotëson kushtet”, tha Basha, gjatë një daljeje për mediat në mesditë.
Në gjykimin e kryedemokratit. Brukseli e refuzoi Ramën dhe qeverisjen e tij. Nga ana tjetër, Uashingtoni e Brukseli, kanë përcjellë urime për atë që e konsiderojnë vendim për hapje negociatash, ndonëse kjo do të ndodhë pas një viti. /tesheshi.com/
