Kreu demokrat Basha ishte, sic çdo mbrëmje, te banorët e “Astirit”, te ajo pjesë që vijon të protestojë për mosprishjen e banesave të tyre, apo kompensimit me çmimin e tregut nëse prishen, për t’i hapur rrugë ndërtimit të Unazës së Re. Mes tyre, Basha denoncoi rrëzimin në parlament një ditë më parë të draftit të demokratëve për një vetting në politikë.
“Çlirimi i politikës nga politikanë të lidhur me krimin dhe politikanë që justifikojnë pasurinë e tyre është domosdoshmëri. Unë e di që shumica e shqiptarëve e mbështet këtë. Shumica e shqiptarëve kanë kërkuar një zgjedhje për këtë. Dje politikanët me integritet patën rastin ta votonin, por siç e patë dje në Kuvendin e Shqipërisë nuk ngriti kartonët një shumicë që përfaqëson popullin, por një pakicë që zhvat, vjedh dhe grabit popullin. Kjo është domethënia e votimit dje. Dje ka ndodhur vetingu i vërtetë i politikanëve. Të gjithë ata që kanë ngritur kartonat kundër ligjit të vetingut të politikanëve kanë dalë hapur si bashkëpunëtorë të krimit dhe vjedhjes”, komentoi Basha.
Argumenti i mazhorancës, ndihur dhe nga kontestimet e Komisionit te Venecias, ka qenë se vettingun e politikës, në mënyrë të plotë e të thellë e realizon reforma në drejtësi, me anë të dy instancave të saj, SPAK dhe BKH, pa qenë nevoja për një process paralel.
Ndërkohë, orët e fundit nga mazhoranca, më saktë nga kryebashkiaku Veliaj po denoncohet rasti i një shtese kati të Bashës, sipas të parit të Tiranës ndërtuar në mënyrë abuzive gjatë kohës së qeverisjes së kryeqytetit. /tesheshi.com/
