Kreu demokrat Basha tentoi të shfaqte diferencën mes tij dhe shefit të qeverisë Rama, ku në Vlorë, mes një grupi të rinjsh në kuadër të një rrugëtimi politik të nisur prej dy ditësh, tha se ai kurrë nuk ka patur lidhje me kriminelët, duke besuar se diçka të tillë e rivali i drejtpërdrejtë politik.
“Çfarë kam unë ndryshe? Është e vështirë të flasësh për veten, por e kam për detyrë ta shpjegoj, përderisa e kërkoj këtë përgjegjësi. E kam për detyrë t’ju them se ndryshe nga ky që qeveris sot, unë nuk kam lidhje me asnjë kriminel dhe nuk jam mbështetur kurrë tek kriminelët për pushtetin tim apo të partisë sime”, tha Basha.
Kryedemokrati tha gjithashtu se ai nuk kishte lidhje as me të ashtuquajturën oligarki, për të cilën tha se do “e çarmatoste”, e se, duke shfaqur një robinhudizëm politik, tha se çfarë ata kishin fituar padrejtësisht, do jua merrte për t’ja dhënë popullit.
“Unë nuk kam asnjë lidhje me oligarkinë. Përkundrazi! Unë dhe partia ime kemi një plan për ta çarmatosur oligarkinë nga instrumentat me të cilat kap shtetin dhe pushtetin dhe, pastaj, vjedh dhe grabit pasuritë e shqiptarëve, siç kemi një plan për t’u marrë çdo qindarkë që i kanë marrë nga taksat tuaja dhe për t’jua rikthyer ju”, shtoi Basha.
Ai potencoi dhe njëherë se rinia do jetë prioritet i tij qeverisës. /tesheshi.com/
