“Qytetari dixhital” ishte një gjetje e ish-kryeministrit Sali Berisha. Pasi doli në opozitë pas zgjedhjeve të 2013, ish-kreu demokrat vendosi që çdo ngjarje që denoncon t´a bëjë në emër të “qytetarit dixhital”, të cilët çojnë kryesisht mesazhe për çështje të ndryshme, dhe që publikohen të plota nga ish-kryeministri.
Por tashmë duket se një praktikë të tillë po ndjek edhe kreu demokrat, Lulzim Basha, në adresë të të cilit po shkojnë denoncime, ashtu sikundër ndodh edhe me Berishën.
PD përmes një e-mail zyrtar njofton mbi denoncimin e një punonjësi policie të Fierit, i cili akuzon kolegët e tij se nuk ka vepruar ndaj një rasti pengmarrjeje.
Mesazhi i këtij punonjësi policie apo qytetari është publikuar i plotë, ashtu sikundër vepron pothuajse çdo ditë ish-kryeministri Berisha kur denoncon çështje të ndryshme.
I vetmi dallim është se Berisha i publikon mesazhet në rrjetet sociale, ndërsa Basha i shpërndan si deklarata zyrtare të PD-së.
Nuk dihet nëse mesazhi ka shkuar përmes telefonit, ashtu sikundër ndodh me ish-kryeministrin, apo janë përdorur mjetet e tjera të komunikimit, por e sigurtë është që fluksi i mesazheve që merr Berisha është disa herë më i madh se ai që kanë filluar t´i përçohen edhe kreut demokrat.
Më poshtë mund të lexoni të plotë mesazhin e shpërndarë zyrtarisht nga PD, në formën e një deklarate në emër të kryetarit të saj, Lulzim Basha.
Deklarata e PD:
Ky është shteti mafioz i Edi Ramës dhe Gramoz Ruçit me kompani:
“Përshëndetje zoti Basha, unë që po ju shkruaj jam një punonjës policie në rrethin e Fierit dhe dua tju tregoj për një ngjarje që ka ndodhur në qytetin e Fierit ku para rreth dy javësh është marrë peng nga Renato Çami një qytetar për tre ditë dhe policia nuk ndërhyri dhe nuk shkoi fare te banesa e këtij të fundit.
Pasi u lirua pas tre ditësh qytetari i marrë peng shkoi në spital në reanimacion në gjendje të rëndë dhe kur shkoi policia si kishte deklaruar se ishte marrë peng nga Renato Cami.
Në lagjen 1 maj në banesën e tij, ku nuk guxon të futet njeri, aty erdhën prapë ushtarët e Renatos dhe e kishin goditur dhe ky person kishte ndryshuar dëshminë e tij. Dua të them se Renato Cami është sponsori më i madh i Partisë Socialiste në Fier në bekimin e kryetarit të Kuvendit, Gramoz Ruçi.
Personi, i cili u mor peng dhe u torturua ishte së bashku me një tjetër person i quajtur Klajdi Crraga, por ky i fundit nuk u kap dot.
Ne si punonjës policie nuk na vjen aspak mirë që futen në burg njerëz për një tullë dhe te këta persona që marrin peng njerëz dhe i torturojnë ata, nuk futemi dot. Policia e Fierit e ka fshehur totalisht këtë ngjarje. Ju lutem anonim.”/tesheshi.com/
