Një ditë pasi u përball me reagimin e bluzave të bardha të frontit COVID, ku u kundërshtua për konkludimet pas një takimi me Urdhërin e Farmacistit, kreu democrat Basha ka bërë një kapërcim te tërmeti.
Ai ishte në Ishëm, ku takoi disa familje me shtëpi të dëmtuar nga 26 nëntori i vitit të kaluar, të cilat pretendonin se nuk kishin marrë asnjë ndihmë, apo se askush nuk po kujtohej për ta.
“Po bëhet një vit nga tërmeti i 26 nëntorit 2019 dhe ende shumë familje jetojnë në kushte të mjerueshme dhe në çadra, pa asnjë mbështetje nga qeveria. Shtëpitë e shkatërruara nga tërmeti janë vlerësuar padrejtësisht, ndërsa për të tjera nuk ka ende asnjë masë për t’i rindërtuar”, shkroi Basha.
Ky i fundit u tha atyre se do kishin tjetër fat pas 25 prillit, pasi do ishte PD ajo që do merrej me rindërtimin.
“…Do të bëjë të mundur që brenda një kohe shumë të shkurtër shtëpitë t’ju rindërtohen dhe vuajtja që keni hequr t’ju lehtësohet sadopak. Më vjen keq që ju kam ardhur në këto kushte të vështira, por ju jap fjalën që do vij t’ju shoh edhe kur ta kemi riparuar këtë dëm edhe t’i keni shtëpitë e rindërtuara”, tha Basha. /tesheshi.com/
