Pas tre ditësh mungese, kreu i PD-së Lulzim Basha i është kthyer çadrës së ashtëquajtur “të lirisë”, pasi është thyer nga Uashingtoni. Ai ka ripërsëritur po ato që tha në intervistën për Zërin e Amerikës, por pa sikletin e pyetjeve të gazetarit përballë.
“Mesazhi i parë nga vizita në SHBA është përgëzimi për qytetarët shqiptarë, për këtë qëndresë të jashtëzakonshme, për këtë kauzë të madhe që i ndan kombet e civilizuara nga ato të pacivilizuara. Mesazhi i dytë janë falenderimet për qëndresën tuaj. Mesazhi i tretë është ai i mbështetjes totale të miqve tanë. Morëm mbështetjen e gjithanshme të PD nga ekipi fitues i presidentit Trump”, ka thënë Basha.
Por lideri i PD-së nuk e specifikoi kë takoi në Uashington, ndërkohë që në edhe intervistën e dhënë për Zërin e Amerikës nuk përmendi asnjë zyrtar të lartë që ka pasur takime.
Dy janë përfundimet nga kjo vizitë: ose në Uashington ai nuk arriti të takojë ndonjë zyrtar relevant, pasi qartazi ka anashkaluar ambasadën e SHBA-së në Tiranë, një precedent i pandodhur më parë; ose ka pasur negociata sekrete në sallonet e larta të Uashingtonit. Jo më kot në SHBA ishte njëkohësisht edhe ministri i Jashtëm, Ditmir Bushati. /tesheshi.com/
