Në momentin më të vështirë për PD-në, mbetur dhe pa kryetar, de jure dhe de fakto, është shfaqur Basha, vetëlarguar më dorëheqje, duke thënë se këtë e bëri për një qëllim të madh, por gjë e cila nuk ka funksionuar.
“Mund t’iu kujtohet që tërheqja para një viti u bë për një interes të madh. Për të mos përçarë demokratët dhe për t’i dhënë një mundësi bashkimit të tyre”, tha ai në një takim me të rinj.
Por e kundërta ka ndodhur: demokratët pas ikjes së tij janë bërë dhe më copash.
“Kjo tërheqje më shërbeu për të parë te vetja ime dhe sa kohë e energji i kam dedikuar luftës që bëjmë me njëri-tjetrin dhe halleve të njerëzve. Kam dalë me një konkluzion se raporti duhet përmbysur. Politika nuk mund të jetë Big Brother. Niveli i debatit politik ka rënë masivisht, e kanë ulur me qëllim. Çfarë mund të debatosh me dikë që vendos tallava, apo me dikë që vetëm shpif shan e sulmon. Ftesa ime e parë është të ndryshojmë kulturën tonë politike. Mos të besojmë fjalët por veprat. Dua të më besoni se jam serioz për këtë platformë”, tha Basha, duke sinjalizuar kështu rikthimin në politikën aktive.
Çështja është se vetë ai dhe çdo metodë politike që përdori, kanë rezultuar dështim total.
Ndërkohë, siç mund të vërehet, rikthimin e bën me dekor rinie dhe me veshje rinore, me mesazhin e nënkuptuar të një të riu në politikë. /tesheshi.com/
