Kreu i opozitës shqiptare, Lulzim Basha u ka kërkuar shqiptarëve që të marrin pjesë masivisht në protestën e së shtunës. Këtë e bëri duke renditur të gjitha kategoritë që, sipas tij do jenë në shesh.
“Protesta e nesërme është bashkimi me i madh i qytetarëve kundër padrejtësisë, kundër keqqeverisjes, kundër varfërisë. Nesër do të marrin pjesë të gjithë qytetarët, gra, burra, të reja, të rinj, pensionistë, familjarë, studente, gjimnaziste dhe intelektualë, njerëz të artit, kulturës e sportit, të papunë e sipërmarrës, fermerë dhe punëtorë”, shprehet Basha, që vijon më tej:
“Nga ky bashkim i madh kanë frikë vetëm ata që duan t’i mbajnë shqiptarët të nënshtruar. Ndaj kanë filluar të shpifin e të gënjejnë për protestën. Mos i besoni tamtamet e qeverisë, mos i besoni ata që kanë katër vjet që ju gënjejnë për punësimin, për shëndetësinë falas, për mirëqenien tuaj”, thekson kreu i PD-së.
Një ditë më parë ai lajmëroi për një “vendim të madh” që do të merret të shtunën, që sipas të gjitha gjasave do jetë bojkoti i zgjedhjeve, për të detyruar Ramën ta lërë qeverinë para 18 qershorit. /tesheshi.com/
