Reforma zgjedhore është thelbësore dhe do të bëhet edhe nëse nuk do Edi Rama. Kështu u shpreh kreu demokrat, Lulzim Basha pas mbledhjes së grupit parlamentar të PD-së, ku janë diskutuar qëndrimet që do të mbajnë deputetët e kësaj partie në lidhje me zhvillimet në Kuvendin e Shqipërisë.
“Reforma zgjedhore është urgjencë absolute dhe duke nisur nga kjo javë ne do nisim konsultimet politike për t’i shtrirë ato më pas me qytetarët. Nuk ka marrëveshje me Ramën. Ky është një cirk. Marrëveshjen ai e shkeli, pasi në thelb kishte votën e lirë. Qëndrimi im për marrëveshjen 18 majit është shprehur në seancën e parë në Kuvend. Thelbi është se marrëveshja vdiq.
Ai bleu votat dhe angazhoi kriminelët. Reforma zgjedhore është domosdoshmëri dhe do bëhet do apo nuk do kryeministri. Të mendosh se Rama do reformë zgjedhore kjo është një gënjeshtër e pastër. Votimi elektronik është përparësi absolute. Përtej deklaratave ne kërkojmë nisjen e reformës zgjedhore. Falë shitblerjes së votës Rama është akoma kryeministër”, theksoi Basha.
Një mesazh ai kishte edhe për ata që tashmë njihen si kundërshtarët e tij brenda PD-së, ndërsa i ftoi të japin kontribute në parti, ashtu sikundër qindar mijëra anëtarë të tjerë.
“PD ka qenë dhe është e hapur dhe do të bëjë gjithçka që kushdo që do të kontribuojë të gjejë veten në çdo formë përfaqësimi”, tha Basha. /tesheshi.com/
