Kryetari i partisë Demokratike, Lulzim Basha reagoi ndaj bashkëbisedimit të kryeministrit Rama me qytetarët përmes rrjeteve sociale, duke e akuzuar atë për tallje me shqiptarët.
Sipas Bashës, Edi Rama mohoi se ekziston një eksod i shqiptarëve që “ikin çdo ditë me mijëra drejt Europës nga dëshpërimi, nga padrejtësitë, nga varfëria ekstreme”.
“Duke mohuar këtë eksod, Edi Rama jo vetëm tallet me mijëra kryefamiljarë, të rinj e të reja, jo vetëm tallet me jetën e tyre dhe me aktin ekstrem që bëjnë duke ikur natën nga shtëpitë e tyre, duke shitur çfarë u ka mbetur pos shpirtit për të bërë pasaportat dhe blerë biletat, por akoma më keq, tregon se ai nuk ka asnjë zgjidhje”, shkruan Lulzim Basha në reagimin e tij, po në Facebook.
Kreu i opozitës vijon me një panoramë me nota migjeniane, kur përshkruan eksodin që, sipas tij, po jetohet çdo ditë nga veriu në jug, në fshat e në qytet. “Dhe një gjë është e vërtetë sa ç’është sot e hënë, se shkaku kryesor i kësaj arratie tragjike, është Edi Rama, keqeverisja e tij në ortakeri me krimin, kriza ekonomike që ka shkaktuar, korrupsioni e hajduteria që ka mbjellë në çdo zyrë të shtetit”, shkruan Basha.
Për të, zgjidhja është e qartë se vetëm ndarja me këtë qeveri e me këtë kryeministër mund ta normalizojë situatën e ta frenojë eksodin dramatik të shqiptarëve. /tesheshi.com/
