Kryetari i Partisë Demokratike, Lulzim Basha, u fokusua mes shumë çështjeve të prekura në komunikimin me gazetarët këtë të premte, tek sulmi mbi banesën e gazetares Klodiana Lala. Sipas tij, sulme të tilla ndodhin vetëm “kur krimi ka mbështetje politike”.
“I turpshëm dhe i neveritshëm është reagimi i prokurorisë, që duhet të nisë veprimet menjëherë për një hetim gjithëpërfshirës. Tallje është Tëitter-i i Edi Ramës. Gazetarja kishte denoncuar aferën “Çyrbja”. Përgjimet tregojnë se si deputeti socialist komunikon në telefon me një anëtar të bandës së Emiliano Shullazit, duke iu referuar bandës me “ne”. Sot e kësaj dite nuk ka reaguar prokuroria”, tha kreu i PD-së.
Ai e vazhdoi argumentin duke sjellë në vëmendje atë që e cilësoi krizën e trefishtë ku ndodhet vendi: krizë e sigurisë, kushtetuese dhe ekonomike.
“Kjo verë nuk ka qenë e nxehtë vetëm për shkak të motit, por edhe në kuptimin e vazhdimit të skandaleve që konfirmojnë krizën e trefishtë. Kryeministri qytetarëve u ka ndërtuar një faqe interneti, ndërsa kohën e kalon me kriminelët. Me ta ka akses të drejtpërdrejtë. Ulet gju më gju me ta dhe me ministrin e Brendshëm. Skandalet që plasin njëri pas tjetrit bëjnë që të harrohet skandali i mëparshëm. Prioriteti i PD-së mbetet shkëputja e lidhjeve të krimit me qeverinë. Asgjë nuk ka për të ndryshuar për mirë në këtë vend sa kohë që vendi bashkëqeveriset me krimin”, shtoi Basha.
“Prioriteti ynë kryesor mbetet ndërprerja e lidhjeve të politikës dhe të qeverisë me krimin, ky do jetë prioritet që do të diktojë dhe planin e punës së opozitës”, tha Basha
Po ashtu, Basha tha se opozita do dalë e bashkuar në zgjedhjet lokale dhe do të përballet e bashkuar në të gjitha sfidat. /tesheshi.com/
