Kreu i opozitës Lulzim Basha, ka reaguar në lidhje me një propozim të mazhorancës për ndryshime në rregulloren e Kuvendit, ku thelbi është që, në rast se Prokuroria kërkon arrestimin e ndonjë deputeti, duhet që patjetër të paraqesë prova bindëse. Pra, si në rastin e Tahirit. Ky propozim i paprin stinës së kapjes së “peshqve të mëdhenj”, ku të gjithë janë në pritje, dhe vlen për të dy kahjet e politikës. Por demokratët e shohin ndryshe.
“Ligji propozon që Prokuroria të paraqesë provat në Kuvend dhe gjyqtari të jetë Edi Rama. Kjo do ta kthejë SPAK-un në një organizatë joqeveritare, sepse gjithë pushteti për të vendosur nëse politikanët e korruptuar do të paraqiten para drejtësisë apo jo, do të jetë i mazhorancës, i Edi Ramës”, tha kryedemokrati Basha.
“PD do ta kundërshtojë fuqishëm këtë akt i cili ka një synim: zhbërjen e reformës në drejtësi dhe që asnjë ‘peshk i madh’ të mos dalë para gjykatës. Po bëjnë gjithçka për t’u mbrojtur politikisht nga reforma në drejtësi”, vijoi kreu demokrat. /tesheshi.com/
