Pas fjalës së Edi Ramës, në përfundim të takimit të grupit parlamentar të PS-së me ambasadorët Lu e Vlahutin, ka reaguar kreu i Partisë Demokratike, Lulzim Basha, i cili shprehet se kryeministri sot e tha me zë dhe figurë pse e donte reformën në drejtësi. Sipas tij, Rama kërkon që të shpëtojë Kokëdhimën përmes reformës si dhe kërcënoi gjyqtarët qe nuk e hëngrën presionin e tij për të mbrojtur Koçon.
“Ky ka qenë dhe ky është koncepti i tij për reformën: Të kapë drejtësinë, të mbajë mbi ligjin klikën e tij të oligarkëve alla koço dhe kriminelëve alla shullaz, të marrë hak ndaj gjyqtarëve që guxojnë të ndëshkojnë për abuzime flagrante miqtë e tij, siç bëri sot me gjyqtarët e Kushtetueses, të cilët i kërcënoi hapur sepse zbatuan ligjin, sepse mbrojtën paratë e publikut. Llomotit kot, kërcënon nga marazi”, – deklaroi Basha.
Ai shtoi se reforma “Rama” për kapjen e drejtësisë ka dështuar përballë vizionit demokratik të opozitës dhe angazhimit serioz të SHBA, BE dhe Komisionit të Venecias.
“Reforma Rama për kapjen e drejtësisë nuk ka më asnjë shans. Kredibilitetin për të çuar në fund reformën në drejtësi që nuk mbron por ndëshkon korrupsionin e ka PD në bashkëpunim me partnerët ndërkombëtarë”, – përfundon shkrimi në Facebook i Lulzim Bashës, i cili shton edhe slloganin nën hashtagun #Shqipëria më mirë pa Edi Ramën. /tesheshi.com/
