Kreu demokrat Basha sqaroi dhe njëherë arsyet se pse pranoi që të ulet në tryezën e Reformës Zgjedhore teksa ishte betuar për të kundërtën.
“Ne e hodhëm këtë hap kaq të rëndësishëm për të cilin kemi luftuar, për t’iu dhënë të drejta shqiptarëve, që të votojnë të pakërcënuar. Me kë do e bënim Reformën Zgjedhore, do linin Edi Ramën ta bënte me oligarkët dhe kriminelët apo me një parlament fals? Pa diskutim që ne jemi garancia që ky proces të bëhet ashtu siç duhet”, tha Basha.
Sipas Bashës, ulja ka dhe një synim, e ai është mundësia për zgjedhje të parakohshme.
“Vullneti ynë është që t’i ofrojmë shqiptarëve zgjedhje të lira e të ndershme, të mbikëqyrura nga një qeveri tranzitore, që garanton zbatimin e e atyre ndryshimeve ligjore që bëjnë të mundur përfaqësimin e shqiptarëve sipas votës së tyre dhe llogaridhënien e të zgjedhurve para shqiptarëve”, theksoi kreu i opozitës.
Nga ana tjetër, i përkthyer (ulja në Reformën Zgjedhore), si një akt kapitullimi pas dështimit të strategjisë së djegies së mandateve dhe më pas bojkotit të zgjedhjeve, Basha i mëshoi tezës së suksesit të saj.
“E gjithë beteja jonë politike, që nga djegia e mandateve për shkak të krizës së thellë të vendit, ku asgjë nuk funksiononte dhe parlamenti ishte kthyer në fasadë, deri tek mos pjesëmarrja në zgjedhje bëri që të arrinim të grisnim fasadën e propagandës dhe t’i tregonim qartë të gjithëve shqiptarëve dhe ndërkombëtarëve që këtu ka një krizë të rëndë politike dhe zgjidhja e kësaj krize kalon përmes disa hapash, të cilat janë të përmbledhura në rezolutën e Bundestagut”, arsyetoi Basha. /tesheshi.com/
