Kreu i PD-së, Lulzim Basha ishte këtë fundjavë në Kolonjë për të prezantuar kandidatin e opozitës për zgjedhjet e pjesshme. Siç dihet, Dritan Hajro është propozuar jo nga PD por nga Partia Agrare, e drejtuar tashmë nga një ish-ministër e ish-deputet socialist, Agron Duka.
Sipas Bashës, Kolonja do të jetë shembulli i bashkimit të madh qytetar për t’iu kundërvënë aleancës së krimit dhe drogës, siç u shpreh ai: “Kandidati i propozuar nga PAA-ja dhe i miratuar nga kryesia e degës së Ersekës është Dritan Hajro. Ai vjen nga një “background” i majtë, por ndan me ne demokratët, ndan me të djathtën shqiptare, me koalicionin tonë opozitar, domosdoshmërinë e përballjes me të keqen që kemi përballë. Domosdoshmëri e qëndresës, refuzimit dhe përballjes me Edi Ramën, me krimin, me drogën, me korrupsionin’, tha kreu demokrat.
Kolonja nuk është si Dibra dhe dilemat se cili krah do ketë fitues nuk ekzistojnë, ndryshe nga rrethi verior kur bashkia është drejtuar edhe nga të djathtë. Kolonja përbën një bastion të majtë pa asnjë devijim në vite dhe nuk pritet të suprizojë. Kjo, sipas treguesve të deritanishëm ku bashkinë e ka patur gjithnjë PS-ja. Por kjo nuk vlen për zona ta tjera, siç është Leskoviku, ku bashkia me ish-ndarjen e vjetër territoriale, drejtohej nga PD-ja. /tesheshi.com/
