Lulzim Basha ka pranuar ftesën e Edi Ramës për dialog dhe të paktën për një ditë nuk e ka përmendur qeverinë teknike.
Duke folur në çadër, Basha tha:
“Nëse do ketë dialog politik ky nuk do kthehet kurrë në një pazar të pisët të disa politikanëve të opozitës dhe mazhorancës, por do jetë dialog politik për zgjedhje të lira dhe të ndershme, dialog për një Republikë të Re”.
“Republika e Re fillon me zgjedhje të lira dhe të ndershme. Republika e Vjetër është komploti më i madh ndaj qytetarëve shqiptarë, bëjnë teatër kukullash nga mëngjesi deri në darkë që të zhvatin shqiptarët, komplot ndaj çdo qytetari”, theksoi kreu demokrat.
Tashmë pritet të shihet nëse kjo do jetë reale apo thjeshtë retorike. Rama e Basha nuk kanë patur ndonjëherë takim a përballje direkte me njëri-tjetrin.
Kur kreu i mazhorancës ishte në opozitë, në paketën e tij të premtimeve për një politike të re kishte parashikuar dhe një takim javor me kreun e opozitës – pa e ditur se cili do ishte ai, e që është pikërisht Basha, njeriu që ia morri bashkinë me vendim gjykate, pasi e kishte mundur me 10 vota diferencë – por në kushte pushteti Rama nuk e mbajti asnjëherë këtë premtim. /tesheshi.com/
