Në një intervistë dhënë për BBC World, kreu demokrat Basha ka mohuar që PD të ketë iniciuar dhunë në protesta, por shfaqjet e e saj i ka quajtur të izoluara. E ndërsa ka mohuar të jenë lënduar policë, ai ka potencuar fort rastin e Sahit Dollapit.
“PD ka bërë gjithmonë thirrje për protesta jo të dhunshme. Është distancuar dhe do të distancohet gjithmonë nga dhuna. Megjithatë, duhet kuptuar se dhuna e izoluar që, falë Zotit, nuk shkaktoi viktima – asnjë person i vetëm nuk u plagos, asnjë polic nuk u lëndua – është shprehje e zemërimit në rritje.
Por numri 3 i PD-së u dhunua brutalisht dhe dhunshëm nga policia. Media ishte në gjendje ta filmonte këtë episod dhe ta transmetonte live”, theksoi Basha.
Para tij, Sekretari i Përgjithshëm demokrat Gazmend Bardhi, i konsideroi lëndimet e policëve gjatë akteve të dhunës në protesta, si “aktrime të disa njerëzve”, sipas tij të diktuara nga qeveria.
Ndër të tjera, në intervistën dhënë BBC World, Basha ka akuzar faktorin ndërkombëtar për raporte jo reale mbi Shqipërinë
“Protestat janë pasojë e krizës së thellë politike në vend. Kështu që, pavarësisht, raporteve të sheqerosura…”, tha Basha, që më pas, i pyetur nga gazetari se “çfarë do të thotë të sheqerosura?”, kryedemokrati iu përgjigj: “Shumë larg realitetit”. /tesheshi.com/
