Kanë nisur pakënaqësitë e para brenda partisë ndaj vendimit të kreut të PD-së Lulzim Basha për të bojkotuar zgjedhjet. A do të krijohet një lëvizje anti-bojkot në PD dhe kush janë kundërshtarët e heshtur që do të sifdojnë këtë qëndrim?
Dy ditë para se kreu i PD-së, Lulzim Basha të vendoste të mos pranonte ofertën e ndërkombëtarëve për ngërçin, Jozefina Topalli, një emër me peshë në Partinë Demokratike dhe favorite për vendin e Bashës më parë, tha se beteja e PD-së me qeverinë është e vonuar dhe se ajo duhej të ishte në fushatë duke u bërë gati për zgjedhjet e 18 qershorit. Pra, dukej hapur pakënaqësia e saj ndaj mënyrës se si po vepron Basha duke vendosur të bojkotojë zgjedhjet parlamentare.
Më herët, në shkurt, kur akoma nuk ishte qartësuar ideja e bojkotit të zgjedhjeve që tani është një realitet, Topalli tha se “unë kam parë të fitojë dhe të humbë PD-ja, por ne nuk kemi bojkotuar zgjedhjet sepse më duket si vetëvrasje”.
Në këtë moment, Topalli dhe të gjithë ata që mendojnë si ajo brenda PD-së janë në dilemën për të vendosur se çfarë do të bëjnë: do të ndjekin Bashën në bojkot dhe vetëvrasje politike apo do të ngerën zërin kundër kësaj linje të ashpër?!
Burime pranë partisë më të madhe në opozitë thanë për tesheshi.com se ka shumë pakënaqësi në radhët e deputetëve aktualë demokratë, si dhe nga strukturat drejtuese, por këto mbeten në kuadrin e fjalëve nëpër kafene ku ata mblidhen pwr tw gjerbur filxhanwt e hallit qw i ka zwnw. Mungesa e mbledhjes së strukturave të partisë ku këta njerëz të gjejnë një medium pwr ë shprehur qëndrimin e tyre, ka bërë që zërat të jenë të veçuar, pa një organizim konkret, duke shpresuar akoma se do të gjendet një zgjidhje e momentit të fundit për t’u futur në zgjedhje të pakënaqurit mbeten të heshtur.
Por jo të gjithë. Fatos Hoxha, ish-deputet i PD-së, u bëri sot thirrje demokratëve që të mos shkonin pas rrugës së Bashës, i cili po e çon partinë në greminë.
Ja çfarë shkruan ai:
“Dy javë më parë, teksa ndiqja me dhimbje e shqetësim zhvillimet brenda dhe rretheqark çadrës, paralajmërova se kryetari Basha, me sjelljen e tij enigmatike dhe pa llogjikë, po e çonte PD drejt rrugës pa kthim, drejt vetpërjashtimit nga zgjedhjet, daljes nga sistemi demokratik dhe vetasgjësimit. Si demokrat i përjashtuar nga angazhimi aktiv ngulmova që demokratët ende të papërajshtuar të
ngrinin zërin në forume e të kërkonin llogari, t’i bënin thirrje përgjegjshmërisë dhe arsyes, të riktheheshin në sistem e të mbronin vlerat që na bashkojnë.
Për fat të keq, thirrja ime e dëshpëruar u shoqërua nga heshtja e thellë dhe e fajshme e udhëheqësisë. Udhëheqësit e PD lanë që vetpërjashtimi i PD nga zgjedhjet të ndodhte, teksa Kryetari i Partisë refuzoi dhe mbylli çdo rrugë dhe hapësirë për kompromis. Sot PD ka hyrë në rrugën pa kthim. Në harkun e 45 ditëve PD do ta shohë veten jashtë sistemit, nuk do të marrë pjesë në zgjedhje, nuk do të jetë e përfaqësuar në parlament, nuk do të jetë as mazhorancë, as opozitë, nuk do të ketë më zë në kapitullin e politikës.
Për shkak të vetpërjashtimit, PD rrezikon të ngelet pa seli e pa ñnancim publik, pa përfaqësim në institucionet e pavarura e në KQZ, pa komisionerë zgjedhorë e pa numërues, pa hapësirë mediatike e pa garanci ligjore. Thjesht do të jetë jashtë gjërave, jashtë proceseve. Kryetari Basha premtoi shtyrjen e zgjedhjeve, premtoi rrëzimin e qeverisë Rama, premtoi qeverinë teknike, premtoi reformë rrënjësore zgjedhore, me garanci supreme për votën e lirë, premtoi mbeshtetje të fuqishme euroatlantike dhe na zhgënjeu. Kryetari Basha ishte aq i sigurtë në rrugën e tij, saqë “dogji” me vetëdije çdo afat dhe procedurë për regjistrimin në zgjedhje.
Kryetari i PD nuk la në këmbë asnjë alterativë, asnjë opsion rezervë. Ndaj sot PD është në buzë të greminës, në pragun e rrugës pa kthim. Nëse udhëheqësia e PD nuk shqetësohet nga ky makth, atëherë shpresa e vetme ngelen demokratët e vërtetë. Ndaj duhet t’i bejne thirrje nevojës. Të gjejnë rrugët për të shpëtuar PD dhe shpirtin e saj opozitar, të mbajnë fushën e betejës, t’i japin zë dhe forcë opozitës, me çdo mjet dhe mënyrë që lejon ligji dhe nevoja për të shpëtuar demokracinë”. /tesheshi.com/
