Lulzim Basha është përplasur me aleatët e vegjël që e ndjejnë veten të frustruar tani që LSI ka zënë vendin kryesor të partnerit, duke eklipsuar ata që i qëndruan besnik kreut të PD-së në kohën më të vështirë.
Siç mësohet, Agron Duka, i cili ka bërë gati polin e qendrës me 10 parti i ka vënë kusht Lulzim Bashës që të hartojë reformën zgjedhore që nuk përjashton partitë e vogla nga gara.
Basha ka premtuar se nëse ata rrinë në aleancë me opozitën, ai do të detyrojë mazhorancën për një sistem që i përfaqëson edhe të vegjlit.
Vangjel Dule, ka qenë kritik me kreun e PD-së në lidhje me mënyrën se ky i fundit po zhvillon partneritetin e ngushtë me LSI-në, duke qenë më shumë “çift” sesa një aleancë e zgjeruar opozitare.
Basha u ka kujtuar ndërkohë krerëve të partive se ata janë deputetë si pasojë e “bamirësisë” së tij, kurse Agron Duka ka thënë se “ai nuk i ka borxh askujt” pasi siç mësohet ka shtuar se i ka dhënë opozitës më shumë se i ka marrë.
Kreu i PD-së nuk se ka bërë tentative për të mbajtur aleancën me të gjithë partitë, por Dules dhe Ndokës i ka kërkuar që të qëndrojnë në koalicionin opozitar dhe të marrin pjesë në serinë e protestave kundër qeverisë.
Përveç Dukes e Dules, mësohet se edhe Mediu ka pasur pretendimet e tij në lidhje me anashkalimin e aleatëve të vegjël, shenjë kjo që pesha e LSI-së në koalicionin e djathtë mund të anojë paksa anijen e opozitës nga partia e Ilir Metës.
Ndërkaq, në takim, aleatët i kanë kërkuar kreut të opozitës të ndikojë ndryshimin e hartës territoriale, duke rishikuar ndarjen aktuale me 61 njësi bashkiake.
Pra në një farë mënyre qasja e partive të vogla ka qenë konstruktive dhe institucionale, kurse Basha kërkon një rrugë “revolucionare”.
Basha u ka thënë aleatëve se PD do të bashkëpunojë me çdo forcë politike që kundërshton qeverisjen e Ramës dhe kërkon rrëzimin e saj në një afat kohor më të afërt.
Ka shumë gjasa që 90-minutëshi i sotëm të ketë qenë i fundmi i opozitës që ishte në çadër e bashkuar dhe garoi më 25 qershor…
Kjo ngaqë të vegjlit, përveçse u është zënë hapësira nga LSI-ja, kërkojnë edhe rrugë institucionale dhe jo revolucion. Këtë e ka bërë të ditur edhe Dash Shehi në një emision televiziv së fundmi. /tesheshi.com/
