Kryetari i Partisë Demokratike, Lulzim Basha i është përgjigjur menjëherë kryeministrit Edi Rama, i cili përkujtoi “Murin e Kujtesës” dedikuar policëve të rënë në detyrë.
Në një njoftim të dërguar për media, Basha thekson se, të rënët në detyrë respektohen duke luftuar krimin, trafikantët dhe drogën.
“Trupa e policisë dhe kujtimi i të rënëve nëpërkëmben e përdhosen çdo ditë nga një ministër i lidhur me bandat e trafikut të drogës në vend, nga një ministër që makinën e tij private e kthen në narkotaksi për Habilajt, nga një ministër që mbajti Shullazin mbi ligjin për 3 vjet derisa ndërhynë partnerët, nga një ministër që prish hetimet për trafikantët duke djegur provat në laborator e duke zbuluar hetimet në media për llogari të krimit.
Nga një kryeministër që fshehu urdhërin e ekstradimit për vrasësin e komisar Dritan Lamajt, që i ofroi atij arratinë, shpëtimin nga drejtësia. Nga një kryeministër që mban Eskobarin e Ballkanit, që pasi e ka bërë drejtor të transportit e mbron edhe nga aksioni ndërkombëtar për kapjen e tij. Një kryeministër që ka krijuar kartelin më të rrezikshëm të drogës në Europë, që ndërton edhe pista avionësh për narkotrafikun.
Shqiptarët kanë në dorë të kthejnë rendin, sigurinë, respektin ndaj policisë, duke hequr krimin nga pushteti. Duke larguar me çdo kusht kartelin e drogës. Policia më mirë pa Edi Ramën. Shqipëria më mirë pa Edi Ramën”, ka deklaruar Basha.
/tesheshi.com/
