Lulzim Basha i është përgjigjur dhëmb për dhëmb Edi Ramës i cili nisi sot fushatën elektorale në sheshin “Skënderbej”, ndonëse jo-zyrtarisht.
Duke folur në çadër, kreu i opozitës tha e nuk do të lejojë kurrë që zgjedhjet të bëhen më 18 qershor.
“Me sigurinë që ju jep për pak ditë krimi në pushtet dhe pushteti në krim, me drogën financiarisht dhe fizikisht që ju ka krimbur trutë, edhe sot hodhe dorashkën ndaj një populli të tërë se nuk do të tërhiqen, se nuk do të ketë qeveri teknike, se zgjedhjet do të mbahen me 18 qershor. Mbajeni mend dhe fiksojeni mirë, po ua them me sigurinë totale të një populli të bashkuar rreth kauzës së vet se zgjedhje me 18 qershor nuk do të ketë, Edi Rama do të largohet, një qeveri teknike do t’i hapë rrugën zgjedhjeve të lira dhe të ndershme”, tha Basha.
Kreu i PD-së jo vetëm është i sigurtë që s’do të ketë zgjedhje, por ka bërë të ditur se ka nisur edhe hartimi i ligjeve të reja. Një nga ato është ligji i Arsimit të Lartë, i cili sipas Bashës do të anulohet së shpejti.
“Themelet e republikës së vjetër po shemben dhe po zënë brenda bandën e fundit në pushtet me në krye Edi Ramën. Orën e parë të republikës së re do të nënshkruajmë anulimin e ligjit të arsimit të lartë dhe rikthimin e tarifave të përballueshme. Ka nisur prej një jave puna për hartimin e ligjit të ri për arsimin e lartë që do konsultohet dhe miratohet vetëm pasi të ketë vulën e rinisë.Shumë ka për të humbur Edi Rama dhe shpura e tij, koncesionet korruptive do të anullohen, lekët e Vilma Nushit me shokë do tua kthejmë shqiptarëve dhe në rradhë të parë rinisë shqiptare”, deklaroi kreu i PD. /tesheshi.com/
