Kreu i PD-së, Lulzim Basha ka ripërsëritur dhe njëherë përbetimin e tij se forca politike që drejton, do të djegë mandantet nëse në Kuvend do miratohet drafti i reformës në Drejtësi, përfshirë dhe me vota të rrjedhura nga opozita. Reagimi i ashpër i tij vjen një ditë pas dërgimit të draftit për miratim, ku nga radhët e opozitës, firmosës ishte dhe Tahir Muhedini, që ndonëse deputet i PDIU-së, që së fundi është rreshtuar krah Ramës, ai vetë vijon të mbajë pozicione opozitare.
“Dërgimi në Kuvend i draftit të njëanshëm për ndryshimet kushtetuese, është një akt i ulët provokimi dhe një përshkallëzim i krizës dhe tensionit shoqëror në vend. Çdo përpjekje për të trafikuar qoftë edhe një mandat të vetëm opozitar me paratë e pista të drogës dhe krimit qeveritar, do të rezultojë në djegien e mandateve opozitare si hapi i parë drejt përvëlimit të Parlamentit ilegjitim. Kjo manovër do të dështojë me turp”, thotë Basha.
Më pas ai ripërsëriti kushtin opozitar, sipas tij të vetëm, për ta votuar me konsensus reformën në Drejtësi.
“Rruga e vetme për një reformë në drejtësi, që ndëshkon dhe nuk mbron krimin dhe korrupsionin, është zbatimi i plotë i rekomandimit 88 të Komisionit të Venecias’, tha ai.
Dhe siç po duket, është një situatë që vetëm verdiktet e ndërkombëtarëve mund t’i japin zgjidhje. /tesheshi.com/
