Në një deklaratë një ditë pas protestës së opozitës, kreu demokrat Basha tha se shqiptarët e thanë fjalën e tyre ndaj qeverisë. Ai, si për çdo protestë organizuar nga PD, rezervoi një vlerësim maksimalist, kësaj radhe duke mos e quajtur “më e madhe ndonjëherë”, por si “të papracedent” në 20 vite.
“Bashkimi i djeshëm i shqiptarëve është mesazhi më i qartë se shqiptarët nuk e pranojnë më këtë gjendje. Ky mesazh ka ardhur përmes një proteste masive popullore të paprecedentë në 20 vite.
Mesazhi i protestës së djeshme është mesazh i qartë se shumica dërrmuese e shqiptarëve janë kundër qeverisë së drogës, që është shkak i varfërisë.
Është po kështu mesazhi i fuqishëm se shqiptarët kanë vendosur të mos ulin më kokën.
Është një mesazh i fuqishëm mbështetje për opozitën dhe kauzën e saj antimafia.
Dita e djeshme është një betejë madhështore e fituar nga shqiptarët që u ngritën mbi dallimet partiake.
Shqiptarët u bashkuan dje për të refuzuar qeverinë e bandave dhe të krimit.
Fitorja e kësaj beteje është një ogur i mirë.
Ne do ta vazhdojmë këtë luftë ditë për ditë për të arritur fitoren e kësaj kauze, pa të cilën nuk do të ketë Shqipëri evropiane.
Shqiptarët e bashkuar në protestë dhanë një mesazh revolte dhe refuzimi për mos pajtim me qeverinë e krimit”, tha kryedemokrati. /tesheshi.com/
