“…është detyrë e secilit prej nesh të mos mbetemi tek urimi pesimist “Zoti na ruajtë”, por të bëjmë gjithçka për ta ndaluar Edi Ramën të dëmtojë më shumë shëndetin tonë! E vetmja kurë e plotë dhe përfundimtare për vendin është largimi i tij”. Ka qenë kjo një ndër frazat e kreut demokrat Basha, gjatë një denoncimi prej tij të çështjes së fishave të matjes së diabetit.
“Në 14 nëntor, në kulmin e skandalit të Saimir Tahirit, u bëmë dëshmitarë të një shfaqjeje të pashpirt të Edi Ramës me një 12-vjeçare që vuante nga diabeti. Ai i premtoi Damiana Bakiut, familjes së saj dhe nëpërmjet saj, 1500 familjeve të tjera që jetojnë me dhimbjen e diabetit të fëmijëve të tyre se fishat e matjes së diabetit do të rimbursohen që nga janari 2018. Janari erdhi, por as Damiana, as 1500 fëmijët e tjerë nuk do të rimbursohen, sepse qeveria e Edi Ramës nuk ka miratuar akoma Listën e Barnave të Rimbursueshme për vitin 2017. Damiana dhe 1500 fëmijët e sëmurë me diabet do të vazhdojnë të blejnë 100 mijë lekë çdo muaj fishat e diabetit, sepse klanet e tregut miliarder farmaceutik, klientë të Edi Ramës, nuk kanë rënë akoma dakord si do të ndajnë fitimet nga lista”, tha Basha.
“Fëmijët me diabet nuk janë të vetmit që janë mashtruar nga Edi Rama. Ai bëri fushatë elektorale me premtimin se mijëra shqiptarë do të përfitonin nga zgjerimi i Listës me 30 ilaçe të reja me fokus tek sëmundjet me përhapje të gjerë si ato të zemrës dhe të veshkave”, vijoi denoncimin kreu demokrat.
Ai më tej tha se gjendja në sektorin e shëndetësisë nën qeverisjen e Ramës, ka bërë të ketë një eksod masiv të mjekëve dhe infermierëve.
“Në 3 vjet janë larguar nga vendi rreth 530 mjekë dhe 848 infermierë, të cilët po kërkojnë jashtë vendit kushte më të mira pune dhe paga më të larta. Gjendja në shëndetësi ka qenë kritike edhe gjatë qeverisjes së Partisë Demokratike, por ne nuk zgjodhëm konçesionarët para shqiptarëve”, shtoi Basha. /tesheshi.com/
