Lulzim Basha kërcënoi se do të bllokojë sërish seancën e nesërme të Kuvendit duke mos përjashtuar asnjë mjet për ta arritur qëllimin, vezë apo diçka tjetër.
Basha ka kërkuar që Rama të pezullojë ligjërisht Armando Prengën, pa e marrë në konsideratë faktin se PS-ja e ka përjashtuar nga radhët e saj. Po ashtu, kreu i opozitës kërkon nga kryeministri t’ia dorëzojnë Gjykatës Kushtetuese treshen e deputetëve Kokëdhima, Suli, Leskaj, për atë që e quajti të drejtën që vetë Kushtetuta dhe gjykata e aserton për të gjykuar mbi mandatet e tyre.
Ndërkaq, në mbledhjen e grupit ka pasur debate të forta mes Bashës dhe disa deputetëve të Partisë Demokratike.
Siç mësohet, disa deputetë kanë kundërshtuar fort bojkotin e PD-së që ka nisur në komisionet parlamentare.
Majlinda Bregu ka qenë e para që e ka pyetur, por kur ka marrë përgjigjen jo bindëse sipas saj, i është kthyer Bashës: “Nuk je tek Fevziu apo tek Balla këtu që të më japësh përgjigje televizive”.
Genc Ruli ka deklaruar se bojkoti duhet menduar sepse nuk ka PD-ja një kauzë kaq të fortë dhe duhet parë më tej si do bëhet rikthimi në Parlament. Asnjë nga deputetët nuk ka mbështetur idenë e bojkotit, por vetëm bllokim të parlamentit. /tesheshi.com./
