Kryetari i Partisë Demokratike, Lulzim Basha deklaroi nga çadra e protestës në bulevard se këtë të shtunë të 13 majit do të jetë dita e parë e republikës së re. Sipas tij, nesër do të “rrëzohet me forcën e bashkimit republika e vjetër e korrupsionit”.
Basha tha se bashkë me këtë rrëzim të republikës së vjetër, nesër do të përmbyllet qëndresa 12 javore me përurimin e republikës së re, që ndoshta do të thotë edhe mbyllje e çadrës.
“Nesër në manifestimin më të madh referendar do të bashkohen të papunët, të zhgënjyerit, gjimnazistët, ish-të përndjekurit, elita e vërtetë e kombit e cila është zëvendësuar nga kriminelët e pushtetarët e korruptuar me në krye Edi Ramën”, tha Basha.
“Dymbëdhjetë javë qëndresë përmbyllen nesër. Nesër kjo qëndresë do të inagurojë republikën e re. Nesër nis rrugëtimi i bashkimit të shpresave të çdo shqiptari të ndershëm, vendimit të madh për të rrëzuar nga themelet dhe me forcën e bashkimit republikën e vjetër të korrupsionit dhe të pazareve të ndyra politike e kupolës së vjetër politike që luajti gjithë këto vite teatrin e ndyrë në kurrizin e të gjithë shqiptarëve, dhe për të themeluar që nesër përmes forcës së bashkimit republikën e qytetarëve shqiptarëve”, tha ai.
Në fjalën e tij Basha nuk u shpreh qartë se kush do ishte fati i çadrës së ngritur prej 18 shkurtit 2017 para kryeministrisë. /tesheshi.com/
