Kryetari i PD-së Lulzim Basha pasi ka cilësuar votën në mbrojtje të Tahirit si votë që mbron “tenderat e vjedhura, koncesionet klienteliste, pasuritë publike të tjetërsuara,etj” ka akuzuar socialistët se hanë darka luksoze që kushtojnë më shumë se paga e tyre mujore.
“Ka një të vërtetë tjetër, mbrëmjen e ditës kur deputetët socialistë të Këshillit të Mandateve vendosën për të mos i hequr mandatin deputetit Tahiri dy miqtë e mi të huaj darkuan në një nga luksozet e Tiranës. Për çudinë e tyre, por jo timen , dy tavolinat e vetme të zëna në restorant kishin në krye dy deputetë socialistë. Në një tavolinë në shoqëri të hareshme pinte puro kubane të zgjedhur dhe në tjetrën një ish-ministër darkonte me verë që kushton më shtrenjtë se rroga minimale në Shqipëri.Dy deputetët, pothuajse tërë jeta rrogtarë të shtetit që në jetën e tyre nuk e kishin parë këtë luks, por që sot jetojnë si sheikë në vendin më të varfër të Europës. Kjo është e vërteta tjetër e votës tuaj sot në Kuvend”- rrëfeu Basha në sallën e Kuvendit, por pa përmendur emra të deputetëve.
Sipas Bashës socialistët me këtë votë për Tahirin kanë mbrojtur veten. “I keni vënë gozhdën e fundit një familje politike dhe ideologjike që sot e keni kthyer në një familje kriminale. Trëndafilin e keni zëvendësuar me lulen e hashashhit”- tha ai. /tesheshi.com/
