Pezmit kryeministror se PD mund të shkojë drejt vetëshkatërrimit dhe se për të shpëtuar nga kjo gjëmë i kanë mbetur dhe 48 orë, kreu i PD-së, Lulzim Basha i është përgjigjur plot entuziazëm:
“Partia Demokratike ka zgjedhur lirinë, pluralizmin dhe demokracinë e vërtetë. Kjo është kauza e drejtë, ky është shërbimi më i madh për popullin dhe për të ardhmen e Evropiane të Shqipërisë. Partia Demokratike do të dalë më e fortë nga kjo betejë, ndërsa Shqipëria do të ketë Republikën e Re, të vërtetë dhe perëndimore”, ka thënë Basha si reagim ndaj Ramës pas mesazheve të këtij të fundit në fjalimin javor.
Po ashtu, kreu i opozitës i ka bërë dhe një profil rivalit të tij, si kundërpërgjigje ndaj faktit që për Ramën, Basha kudo ku i është besuar një detyrë, e ka dreqosur atë, siç po vepron dhe me PD-në, gjithnjë sipas gjykimit kryeministror.
Ndërsa për Bashën, ja kush është Edi Rama:
“E gjithë karriera e Edi Ramës është ngritur mbi blerjen e të gjithëve dhe çdo gjëje, të partisë, të aleatëve, të partnerëve, të bizneseve, të mediave, të shoqërisë civile. Me zhagen e lejeve të ndërtimit, të koncesioneve, të favoreve, të parave publike, Edi Rama ka blerë rrugën e tij deri në majën e pushtetit. E vetmja që nuk ka blerë dot ndonjëherë Edi Rama ka qenë Partia Demokratike. Dje pasi mbylli edhe pazaret e fundit me ata që shiten dhe blihen, pasi bëri një listë kandidatësh me deputetë pasuria e të cilëvë e kalon edhe prodhimin kombëtar të Shqipërisë, Edi Rama kuptoi se prapë nuk mund të blejë dot pluralizmin dhe demokracinë, sepse demokratët e vërtetë nuk u shitën. Ndaj me dinakërinë e tij të zakonshme sot u shtir sikur ka hallin e Partisë Demokratike”. /tesheshi.com/
