Droga, e cila pritej të ishte karta më e fortë e qeverisjes së Ramës, e piketuar e tillë pas aksionit të pazakontë në Lazarat, duket se po i kthehet atij në mallkim.
Tashmë, duke përfituar dhe nga një bindje kolektive se vërtet që kultivimi i kanabisit është përhapur gjithandej nëpër Shqipëri pas Lazaratit, opozita po i mëshon çdo ditë e më fort kësaj teze.
Edhe në ndalesën e tij të radhës, në Gramsh, kreu demokrat Lulzim Basha tha se në tre vitet e qeverisjes së Ramës Shqipëria u kanabizua.
“I vetmi biznes që lulëzon është ai i hashashit. Përmes krimit, korrupsionit dhe varfërimit të shqiptarëve, Edi Rama po përpiqet të asgjësojë zgjedhjet e lira dhe të ndershme”, tha Basha.
Dhe e gjitha kjo sipas tij, është bërë me ndërgjegje të plotë nga Rama.
“Në këtë realitet të keqqeverisjes së gjithanshme, të përkeqësimit që shënon çdo fushë të jetës, Edi Rama ka prezantuar edhe një gjëmë të madhe për shqiptarët, kriminalizimin e shtetit që i ka hapur rrugë drogës së mbjellë anembanë, drogimit të Shqipërisë. E ka bërë me ndërgjegje të plotë. Edi Rama e ka ditur. E ka bashkëplanifikuar me kriminelët që ka vënë në çdo strukturë shtetërore, se kriminalizimi i shtetit do të çonte në kanabizimin e Shqipërisë. E ka ditur dhe prandaj nuk e ka vënë ujin në zjarr sepse për të paratë dhe pushteti është gjithçka që ka rëndësi. Sepse për të, punë e madhe se ka papunësi, shkoni në emigracion ju tha kuksianëve para një viti, punë e madhe se ka varfëri. Po pate varfëri eja skllav në fermën e drogës së Edi Ramës dhe Saimir Tahirit. Përmes krimit, korrupsionit dhe varfërimit të shqiptarëve mendon se e ka ulur dhe më tej çmimin e votës dhe se me pare e korrupsionit dhe me kërcënimin e krimit do t’ia dalë të asgjësojë zgjedhjet e lira dhe të ndershme”, deklaroi më tej kreu demokrat.
Sakaq, Ramës i ka mbetur si armë vetëm raporti i Guarda Di Finanza-s, por dhe një mbështetje ndërkombëtare, për t’i bërë ballë akuzave të opozitës. /tesheshi.com/
