Kreu i partisë Demokratike, Lulzim Basha u deklaruar iprerë kundër një bashkëpunimi me LSI-në, për të ardhur sa më shpejt në pushtet. Gjatë intervistës me gazetarin Peka në emisionin “Fakt”, Basha tha se nuk i interesojnë e as merret me mesazhe dhe as me retrospektiva episodike.
“Nuk kam parë edhe nuk shoh dhe nuk do të shoh asnjë mundësi për rikthimin e Partisë Demokratike në pushtet si një patericë e Ilir Metës apo Edi Ramës. Partia Demokratike do të vijë në pushtet me votën e lirë të qytetarëve shqiptarë me një proces të ndershëm edhe të lirë zgjedhor, atëherë kur shqiptarët ti besojnë alternativës dhe rrugëdaljeve që do të paraqesë, atëherë kur shqiptarët të besojnë se ne jemi shpresa e re për të vënë Shqipërinë në rrugën e daljes nga kriza dhe për ti dhënë shpresë shqiptarëve për një jetë më të mire”, tha Basha
“Mua më intereson thelbi, diagnoza. Diagnoza është një qeveri e cila tashmë pas dy vjetësh, sepse për dy vjet mendoj se edhe një pjesë e publikut ka dashur ti japë kohë kësaj qeverisjeje që të shikojnë se çfarë po bëjnë. Pas dy vitesh ajo që më intereson është rruga e daljes nga kjo krizë e gjithanshme ku gjendet Shqipëria”, tha Basha i pyetur nëse është e vërtetë se vjeshtën e kaluar në ish-zyrën e tij në bashki i është marrë mendim, nëse do të ishte i gatshëm për hir të reformave të mëdha për një bashkëqeverisje me Edi Ramën. /tesheshi.com/
