Kreu i PD-së, Basha dha garanci se partia e tij nuk do t’i bojkotojë zgjedhjet e 18 qershorit, e se për më tepër do t’i fitojë ato. Kjo, pas aludimeve nga sallonet e politikës dhe medias se me kushtëzimet e saj, ku veçon ajo e votimit dhe e numërimit elektronik, PD do tenton të shkojë drejt bojkotit.
“Partia Demokratike merr pjesë në zgjedhje dhe zgjedhjet do të jenë të lira dhe të ndershme. Nuk ka asnjë skenar tjetër. Partia Demokratike merr pjesë në zgjedhje të lira dhe të ndershme dhe ne do të fitojmë me zgjedhje të lira dhe të ndershme”, tha Basha. Por sipas tij, votimi dhe numërimi elektronik është i panegociueshëm.
“Kontestimi i zgjedhjeve ka shoqëruar çdo proces zgjedhor. Votimi dhe numërimi elektronik është fundi i kontestimit të zgjedhjeve mbi bazën e kontestimit të votës, shitblerjes së votës. Me këtë votim çdo shqiptar e ka të garantuar votën e tij apo të saj dhe nuk ja prek votën askush”, deklaroi Basha, i cili si për ta përforcuar akoma dhe më tej qëndrimin e tij, tha se i kishin ardhur një mori mesazhesh lidhur me propozimin e partisë së tij.
“Kam marrë me mijëra mesazhe nga qytetarët dhe mbështetësit tanë dhe nga faktorë të tjerë të rëndësishëm, përfaqësues të shoqërisë civile, medias, botës akademike, sipërmarrës madje edhe njerëz publikisht të afishuar si përkrahës të së majtës, që vlerësojnë votimin dhe numërimin elektronik si propozimin më të rëndësishëm për zgjedhje të lira dhe të ndershme të bërë në Shqipëri në 25 vitet e fundit”, u shpreh kreu i PD-së. /tesheshi.com/
