Kryetari i PD-së, Lulzim Basha ka qëndruar më shumë se 90 minuta në takim me ministrin e Jashtëm Sigmar Gabriel, por nuk ka bërë asnjë milimetër prapa nga qëndrimet ekstreme të afishura.
I vetmi qëndrim që duket se është ofruar si kompromis, por që në fakt është thjesht një “larje goje”, është deklarata që “jemi gati të votojmë vettingun nëse rikthehen 7 ligjet e drejtësisë në Kuvend”.
Ndërkaq Basha ndryshe nga disa zëra brenda PD që e akuzuan ministrin e Jashtëm edhe për “nazist”, nuk zgjodhi përplasjen me Sigmar Gabriel kundër bojkotit të Parlamentit dhe zgjedhjeve të 18 qershorit, por tha se e kishte njohur kryediplomatin gjerman me ato që i quajti “fakte të pakundërshtueshme që çmontojnë propagandën e qeverisë”.
“Takimi im me ministrin e Jashtëm gjerman zgjati goxha dhe gjatë këtij takimi e njoha atë me faktet dhe argumentet e pakundërshtueshme për gjendjen e krimit dhe drogës në vend, por edhe për reformën në drejtësi”, deklaroi në fund të takimit kreu i demokratëve, Lulzim Basha.
Ai tha se i bëri të qartë Gabrielit që nuk është Partia Demokratike që po bllokon reformën në drejtësi dhe procesin e Vettingut.
“Vettingu nuk do bëhet siç e do Edi Rama, as siç e dua unë. Vettingu nuk do bëhet si e do asnjë Kryeministër, sepse është konflikt interesi, sepse qeveria ka në dorë paratë, krimin në këtë rast. Kush do ta hetojë? Gjyqtarët që do të caktojë Edi Rama?! Opozita do kthehet të votojë 6 ligjet kur Edi Rama të shpërbëjë thyerjen e paktit. Zgjedhje të lira e të ndershme vetëm përmes një qeverie teknike”, tha ai./tesheshi.com/
