Duke u vendosur metaforikisht dhe simbolikisht para armaturës skendërberjane në Krujë, kreu demokrat Basha e thelloi dhe më shumë krisjen mes tij dhe presidentit Meta, teksa deklaroi se zgjedhjet nuk janë çështje datash por standartesh. Duke mos pranuar që as formalisht të regjistrohet për 13 Tetorin presidencial, Basha tha se “beteja për zgjedhje të lira nuk është kauzë partiake, por është betejë e çdo shqiptari”.
“Zgjidhja nis me dënimin e politikanëve të kapur në blerje votash dhe në bashkëpunim me krimin e organizuar për pushtetin dhe pasurinë e tyre”, shtoi kreu demokrat.
Sipas Bashës, tashmë ka mbetur vetëm ikja e Ramës, pasi aksioni opozitar 6-mujor ia arriti qëllimit.
“Opozita e Bashkuar e nisi këtë betejë me një akt sakrifice që ishte dorëzimi i mandateve, dorëzimi i imuniteteve, i privilegjeve dhe i karrigeve të pushtetit për t’u rreshtuar në krah të qytetarëve. Treguam se rruga që nisëm ishte një rrugë sakrifice për interesin publik. Vendimi që morëm ktheu besimin tek njerëzit, se beteja që kemi nisur nuk ishte një betejë për karrike, siç përpiqej ta paraqiste Edi Rama. U rikthye besimi se opozita e bashkuar nuk është pjesë e teatrit të ndyrë politik, ku një grusht njerëzish kanë kapur burimet e shtetit, buxhetin e shtetit, taksat e shtetit, pasuritë e shtetit, në kurriz të të gjitha shqiptarëve të tjerë”, tha Basha. /tesheshi.com/
