Basha u rishfaq kësaj here në publik me disa ish-figura demokrate, por që kanë hequr dorë nga politika, të cilët ngjajnë gjithsesi me një KOP të shtyrë në moshë.
Kështu, krah tij u panë Preç Zogaj, një ndër emrat e Dhjetorit, themelues i PD-së, Bamir Topi, ish-president, Spartak Ngjela, ish-Sekretar në PD, si dhe Rrexhep Uka, ish-ministër Bujqësie.
Arsyeja e kësaj prezence ishte reforma zgjedhore, por tej kësaj, Basha shpalosi ambicien për t’u riformatuar me figura në dukje potente dhe tërheqëse për publikun, dikur pra ish-zyrtarë të lartë demokratë.
“Sot ndodhemi më pak se një vit nga data fillestare e caktimit të zgjedhjeve, sipas kodit zgjedhor dhe në një moment tërësisht të parapërgatitur nga një pjesë tjetër e politikës, për t’i mohuar shqiptarëve, përfitimet e një reforme të vërtetë zgjedhore. Nesër është afati i fundit i komisioni të reformës zgjedhore dhe nuk është e rastësishme që kjo tryezë dialogu me gjithë faktorët politik, partitë politike opozitare mbahet sot pikërisht si një kambanë jo për interesat e partive politike që përfaqësoni, por për interesat e shqiptarëve që edhe një herë rrezikojnë t’i nënshtrohen interesave të ngushta personale të atyre që me ndryshimet kushtetuese të vitit 2008 përmbysën balancën institucionale, përqendruan pushtetin dhe në këtë mënyrë dëmtuan jo pak. Detyra jonë në një situatë normale është hartimi ose shpalosja të një alternative të plotë dhe të besueshme qeverisëse. Po përgjegjësia për të zgjedhur atë, apo për të vazhduar për t’u qeverisur nga monarkët e post-tranzicionit, është e qytetarëve shqiptarë. Por nuk jemi akoma aty. Nuk jemi akoma aty sepse për shkak të 2008-ës qytetarët e kanë të pamundur të finalizojnë vullnetin e tyre. Sepse siç e kemi parë zgjedhje pas zgjedhjesh, një jo shumicë qytetarësh, kthehet në një shumicë politike qeverisëse. Legjitimiteti i pushtetit është thellësisht i cënuar”, tha Basha.
Ditët në vijim pritet të shihet se a do e vijojë Basha investimin e tij me ish-figura demokrate, duke përdoror kështu kartën e një KOP-i tjetër, në kohë të tjera, në funksion të rifuqizimit politik. /tesheshi.com/
